22 сакавіка 2024 года ў Беларусі аддаюць даніну памяці жыхарам вёскі Хатынь, якая была спалена фашыстамі 81 год таму - 22 сакавіка 1943 года. Узгадваючы Хатынь, беларусы прыгадваюць тысячы іншых беларускіх вёсак, знішчаных нямецка-фашысцкімі захопнікамі ў гады Вялікай Айчыннай вайны.

Вёску Хатынь гітлераўцы спалілі разам са 149 жыхарамі, з якіх 75 дзяцей. Ні ў чым не вінаватым людзям з вёскі фашысты вынеслі смяротны прысуд. З дамоў у вёсцы гітлераўцы выгналі старых, дзяцей, жанчын і мужчын. Хворых і нямоглых падштурхоўвалі прыкладамі. Усіх сагналі ў хлеў на ўскрайку, у якім некалі захоўвалася сена. Дарослыя як маглі супакойвалі дзяцей, але трывога з кожнай хвілінай усё мацней ахоплівала іх. Зачыненыя ўнутры, яны не ведалі, што рабілася звонку... Вёска больш не адрадзілася...

22 сакавіка, у Дзень памяці ахвяр Хатыні, па ўсёй краіне праходзяць мерапрыемствы ў памяць аб мірных жыхарах, якія загінулі ад рук карнікаў у гады Вялікай Айчыннай вайны. У 12.00 Хвіліна маўчання ў памяць аб ахвярах Хатынскай трагедыі прайшла ў Бабруйску.