Вясновы свежы вецер, сонца зіхаціць на спіцах тысяч веласіпедных колаў, забіяцкія ўсмешкі. Бабруйск сустрэў 1 Мая масавым велапрабегам, прысвечаным Году міру і стварэння. Палічыць усіх удзельнікаў велапрабегу немагчыма, бо рэгістрацыя на яго не праводзіцца. Але, па адчуваннях народа было больш, чым у папярэднія гады. Удзел у мерапрыемстве прынялі прадстаўнікі гарадской улады, грамадскіх арганізацый, прадпрыемстваў і навучальных устаноў. На чале з загадчыкам нашай установы дашкольнай адукацыі Рыжанковай Таццянай Сяргееўнай у велапрабегу прыняла ўдзел каманда супрацоўнікаў ўстановы: Рубан Аксана Сцяпанаўна, Шчарбіч Надзея Аляксандраўна, Цішкова Алена Віктараўна, Рослік Ганна Сяргееўна, Максімава Кацярына Мікалаеўна, Боженок Дыяна Валер'еўна, Пасюра Ілона Якаўлеўна, Еўдакімава Марына Вітальеўна.

Пачалося мерапрыемства з ускладання кветак да "Вечнага агню" ў памяць аб загінуўшых героях. Каля 10 гадзін быў дадзены старт велапрабегу і тысячы яго ўдзельнікаў жвава пакруцілі па Мінскай. Гэта сапраўды яркія эмоцыі - "ляцець" на ровары без прыпынкаў па галоўнай вуліцы горада, не спыняючыся на чырвоны сігнал святлафора, не зважаючы на аўтамабілі і грамадскі транспарт. Такое бывае толькі раз у годзе! Сярод удзельнікаў былі і Стары, і малы. Некаторыя перамяшчаліся на самакатах, электрасамакатах і электравеласіпедах, звярталі на сябе ўвагу ўдзельнікі на лыжаролерах. Многія аўтамабілісты, вымушаныя прапусціць удзельнікаў-веласіпедыстаў, сігналілі ў знак прывітання, а кіроўцы двухколавага транспарту нешта выкрыквалі і махалі рукамі ў адказ. Пешаходы на ходніках спыняліся і здымалі на смартфоны рухомую велакалону - дух адзінства ў гэтую раніцу рэальна адчуваўся ўсімі бабруйчанамі, якія знаходзяцца на шляху ўдзельнікаў велапрабегу.